莊梅岩原創劇本、 陳志發 Stevefat 執導的 ViuTV 迷你劇集《短暫的婚姻》上周已播畢，網絡世界好評如潮，而我真心覺得，這份劇本寫得太好，五奪「香港舞台劇獎」最佳編劇的莊梅岩，她編寫的故事不是耍的，對白尤其出色，有力、精準、簡潔，只消幾句功夫，已帶出每個角色的性格、過去，還有營造中產生活品味，我想起今年初看坂元裕二的TBS日劇《四重奏》每集都要Jot Notes記下對白（全集請Click：http://bit.ly/2vdyHKF），《短暫的婚姻》終於再次燃起我這份慾望。
第一集「The Move In」
Galen ─ 陳奕迅飾
Malena ─ 蔡思韵飾
Cecilia ─ 蔡潔飾
【 Galen獨白第一段 】
「有時你鍾意一個地方，未必因為嗰條街特別靜，嗰度啲樹特別綠，或者嗰度啲人特別Nice。有時你鍾意一個地方，係因為嗰度有好多回憶。」
【 Galen獨白第二段 】
「有時你鍾意一個地方，係因為有啲重要嘅事喺嗰度發生過，有啲重要嘅人同你喺嗰度生活過，嗰啲事一旦過去，嗰啲人一旦消失，呢個地方畀你嘅感覺就會轉變，你曾經喺嗰度愈開心，呢個地方就會令你愈痛苦。」
【 Galen與Malena初遇見 】
Mal：張Poster
Galen：《Theatre Paradiso》
Mal：香港譯做《星光伴我心》，呢套係我最鍾意嘅電影，呢個導演（Giuseppe Tornatore）啲嘢我都好鍾意。唔怪得之啦，頭先仲以為我自己聽錯，你播緊張Soundtrack呀？
Galen：（點頭）係。
Mal：呢個導演後尾仲有套戲，叫做《西西里的美麗傳說》（Malèna），我仲因為呢套戲，改咗自己個名叫做Malena，個女主角Monica Bellucci靚到呢，我都唔知點形容。
Galen：我冇睇過嗰套。
Mal：咁就唔好睇喇，如果唔係你一定話我唔知醜，你都鍾意呢個導演啲嘢㗎？
Galen：其實我唔識呢啲嘢，我太太生前好鍾意呢套戲，佢結婚嘅時候，我特登Bid咗嚟送畀佢，係意大利嘅首映Poster。
Mal：我見到，仲有導演親筆簽名添。
【 Malena與Cecilia的Girls’ Talk 】
Ceci：點呀，Terry呢排點樣呀？升咗Partner（合伙人）好忙呀？你地點呀？
Mal：都係咁啦，佢成日鬧我呢，話我唔Push個仔，一諗起佢下年升小學呀，唉，頭都痛。
Ceci：你唔好成日講個仔啦好心你
（Ceci捏了一捏阿Mal的胸部）
Mal：喂，做乜嘢呀，扁咗喇！
Ceci：點解你連胸圍都唔戴呢？喂，成個阿婆咁，Baby呀，喇，啲麵粉扁咗可以搓過，但段婚姻冇咗就冇㗎喇喎，知唔知呀？
Mal：呢到我屋企嚟㗎，我當你係自己人先唔戴喳。
Ceci：唉，阿Mal，你假假地以前都係一個Designer，唔好搞到咁呀……睇住個老公呀！
【 Mal與Galen天台對話 】
Mal：英國，我嗰陣喺台灣讀完大學，都有諗過Plan去英國讀書，老師呢，嗰陣仲幫我寫埋推薦信，叫我去Saint Martins。
Galen：咁點解冇去到呢？Saint Martins好好㗎喎呢間Art School
Mal：錢係一個問題啦，嗰陣諗住儲多幾年錢先過去，不過原來時間先係問題，但依家都唔使諗lu。
Galen：因為……
Mal：擺唔低囉，揼低個仔自己走去讀書，邊有可能？
Galen：都唔係嘅，到佢大啲囉，好似Darren咁大，咁你就自由好多㗎喇。
Mal：梗係唔得啦，咁細個，好多人都要人睇住㗎
……
Mal：Sorry！
……
Galen：咩事呀？
Mal：成日都係咁，唔小心，愈係避忌就愈容易講錯嘢，
Galen：避咩呀？避講我太太呀？
Mal：嗯。
Galen：乜你覺得唔提我就唔會諗起㗎喇咩？冇用㗎！呢條街，呢幢大廈，啲雲，個天，我見到每樣嘢都會諗起佢，呢個天台冇人打理，我地啱啱搬入嚟，呢度立立亂，啲人就將所有啲唔要嘅傢私、雜物都搬晒上嚟，我哋就逐件逐件搬番落街嚟清空佢，跟住買啲櫈呀，啲架呀，盆栽，阿敏好叻做呢啲嘢，阿敏係我太太，佢喺國際學校教Art架，嗰度都一樣，學校啲小公園、小花園全部都搞到好靚，所以我冇可能唔諗起佢，我見到任何植物都會諗起佢，我見到Darren會諗起佢，Darren同佢對眼一模一樣，每日都喺度提緊我，佢已經唔喺度，所以冇得避，亦都唔使避，無論講咩嘢，我都會諗起佢！
【 Galen獨白第三段 】
「有時我覺得好戇居，我哋咁努力去生活，我哋太認真，每日返工放工，經營事業，照顧屋企，我哋忙到唔記得咗，或者開心到唔記得咗，其實所有嘢都會結束。我哋每日營營役役，就只係為咗等人生嘅不測，當你決定要離開一個地方，就唔應該同佢嗰度嘅人建立新嘅關係。」
重溫《短暫的婚姻》請Click：http://bit.ly/2l6cHwV
【 延伸閱讀 】
「2017香港電視大獎」：http://bit.ly/2x6KZSh
ViuTV新節目 ── 兩名男神蒙古相遇：http://bit.ly/2yISker
（22102017）
